MAOMBI SIKU KUMI KUIOMBEA TANZANIA KATIKA MASUALA NYETI YATANGAZWA

Kanisa la EAGT Samaria Mikocheni A, jijini Dar es Salaaam limetangaza siku kumi za maombi ya kufunga kwa ajili ya kuombea bunge la Katiba, Uchaguzi wa Serikali za Mitaa unaotarajiwa kufanyika mwezi Oktoba mwaka huu pamoja na uchaguzi mkuu utakaofanyika mwakani 2015.

Askofu msaidizi wa Jimbo la Kinondoni na Mchungaji  wa kanisa la EAGT Samaria Mikocheni ‘A’, Filipo Phiri alitangaza maombi hayo wakati akitoe neno la Mungu kwa waamini wake Machi 2, mwaka huu na kuwataka waumini wa kanisa hilo kujitoa mhanga katika kuombea mambo hayo muhimu kwa taifa la Tanzania.

Pamoja na hayo, Mchungaji Phiri alisema anashangazwa na namna bunge la Katiba lilivyoanza kwa kutanguliza masilahi ya vyama vyao huku maoni yaliyotolewa na wananchi likitaka kuyaacha kwa kutoa  maelezo yanayokinzana na tume ya Warioba kwa kudai kuwa linaweza kubadilisha kabisa mapendekezo yote yaliyokusanywa na tume.

“Rasimu ya Katiba hii ikipitishwa itasaidia kukomesha masuala ya ufisadi, wizi wa mali za umma pamoja na uzembe wa viongozi wetu kwa kuwa inawapa mamlaka wananchi kumtoa kiongozi wao au mbunge wao kama hafanyi vizuri,” alisema mchungaji Phiri.

Aliongeza kuwa kama rasimu hiyo itapishwa itasaidie pia kutatua migororo ya kisiasa nchini inayosabishwa na tume ya chaguzi kutokuwa huru kwa sababu rasimu inapendekeza tume huru ya uchaguzi.

Aidha, mchungaji Phiri aliwaasa wakristo kuachana na dhana potofu kuwa kujihusisha na siasa ni dhambi na kuwataka wao wawe wa kwanza kujiunga na vyama wanavyovipenda na kugombea ngazi mbaliombali za uongozi.

“Msipochukua fomu za kuogombea katika chaguzi za serikali za mitaa na uchaguzi mkuu wa madiwani, wabunge na rais, mnataka mtawaliwe na nani?

“Hakuna maandiko yoyote kwenye Biblia Takatifu yanayomzuia mkristo kujihusisha na siasa, au kutogombea ila ninyi wenyewe mkikaa makundi makundi mnanyidanganya hivyo kuwa biblia inakataa kujihusisha na siasa, chukueni fomu gombeeni,” alisisitiza mchungaji Phiri.

Mchungaji Phiri aliwaambia waumini wake kuwa waamini kuwa katika maombi hayo ya siku kumi Mungu atakwenda kuwatendea Watanzania kwa kuwapatia Katiba nzuri inayotokana na wananchi, kuwa na chaguzi za huru na za Amani bila umwagaji wa damu.

“Tuhakikishe katika maombi yetu ya siku kumi tunawaombea wajumbe wa Katiba, uchaguzi wa serikali za mitaa na uchaguzi mkuu wa mwakani.

“Tuombee tu kwa imani na Mungu atakwenda kuwatendea watanzania sawasawa na vile tulivyoomba na hakika Mungu atawasaidia wajumbe wetu huko Dodoma,” alisema mchungaji Phiri.

Baadhi ya wajumbe wa Mkutano Mkuu wa Mwaka wa CASFETA-TAYOMI (AGM) wakiwa katika vikao vya vikundi kujadili mambo mbalimbali kabla ya kuwasilisha ripoti ya maendeleo ya utekelezaji wa mipango na mikakati kwa kamati kuu na kufanya uchaguzi wa viongozi ngazi ya taifa mjini Dodoma uliofanyika mwaka 2012, {Picha imechukuliwa mabakta}