Risiti za zuia mchango wa ukarabati wa shule

Josea Sinkala, Mbeya

Baadhi ya wazazi wa wanafunzi wanaosoma katika shule ya msingi Ilomba iliyopo kata ya Isyesye jijini Mbeya wameilaumu kamati ya shule hiyo kwa kutowapatia risiti za michango wanayochangia kwaajili ya ujenzi wa shule hiyo.

Wamesema hali hiyo inawanyong’onyeza kuendelea kuchangia kutokana na kutokuwa na uhakika wa michango yao kama inatumika kwa lengo lililokusudiwa.

Wakizungumza katika kikao cha wazazi wamesema wameshangazwa na kitendo cha kamati ya shule kushindwa kuwapatia risiti tangu michango hiyo ianze kuchangishwa mwaka jana, hali inayosababisha wazazi hao kupata mashaka na uongozi unaoshughulikia fedha hizo.

Hata hivyo kupitia mkutano huo, baadhi ya wazazi wametoa kero zao juu ya walimu kuwarudisha wanafunzi nyumbani wakati wa masomo na kuwatuma kufanya kazi za kilimo.

Kwa upande wake Mwenyekiti wa kamati ya shule hiyo      Ezekiel Mwanzonje akizungumza na blogu ya Nguvu ya Habari baada ya mkutano huo amekiri kuwepo kwa changamoto ya ugawaji risiti kufuatia baadhi ya wazazi kutoa michango yao nusunusu hivyo amesema inawawia vigumu kutoa risiti kwa wote.

Naye Mjumbe aliyekuwa akipokea michango Agness Nyenze amesema pia tatizo linguine lililochangia wazazi kutopewa risiti zao kwa wakati ni kutokana na kuchelewa kupewa kitabu cha risiti kutoka katika uongozi wa kata.

Shule ya msingi Ilomba ilianzishwa zaidi ya miaka sitini iliyopita ambapo mpaka sasa inakabiliwa na changamoto mbalimbali ikiwemo uhaba wa vyumba vya madarasa, ofisi na vyoo vya walimu na blogu ya Nguvu ya Habari imeshuhudia kuwepo kwa tundu moja la choo linalotumiwa na walimu wote wa kike na kiume ishirini katika shule hiyo.