Manase: Madiwani Watumikieni Wananchi Bila Ubaguzi

Mbeya, Mwandishi wetu

Madiwani waliochaguliwa katika uchaguzi mkuu uliopita wametakiwa kufanyakazi kwa ushirikiano badala ya kuendeleza itikadi zao za kisiasa ili kuwaletea maendeleo wananchi waliowachagua.

Rai hiyo imetolewa na Mbunge wa jimbo la mbeya Vijijini Oran Manase Njeza wakati akizungumza baada ya kumalizika kwa zoezi la kuwaapisha madiwani wa halmashauri ya mbeya vijijini lililofanyika katika ukumbi wa halmashauri ya wilaya ya mbeya.

Mbunge huyo alisema changamoto zinazolikabili jimbo hilo zinaweza kutatulika endapo viongozi wake wakishikamana na wananchi wao katika kufanya shughuli za kimaendeleo ambapo amesema shabaha kubwa ya wananchi wengi ni kuboreshewa sekta ya kilimo kama njia mojawapo ya kujikwamua kiuchumi.

Aidha Njeza alisema kuwa viongozi hao wana wajibu mkubwa wa kuwasaidia wananchi kujiajiri badala ya kutegemea ajira serikalini pekee na kuwakumbusha kuwa wana deni kwa wapiga kura wao kama walivyokuwa wakijinasibu katika majukwa ya kisisa wakati wa kampeni.

Nao baadhi ya madiwani walioapishwa wakiwemo waliokuwa wagombea uwenyekiti wa halmashauri wameahidi kushirikiana na viongozi wengine pamoja na wananchi ili kuleta maendeleo jimbo hilo.